НовАсном претставува организација која ги поддржува меѓународните договори што одат во прилог на зачувување на мирот, стабилноста и просперитетот на Балканскиот Регион.

Во таа насока, очекувавме дека Договорот за добрососедство, пријателство и соработка меѓу Македонија и Бугарија, по примерот на добрите европски практики, ќе се се базира на целосно меѓусебно почитување на основните човекови права и идентитетските различности, ќе биде цврст мост за имплементација на вистинските европски вредности и ќе отвора вистински перспективи за граѓаните на двете земји.

Очекувавме дека договорот за пријателство со Бугарија, во основата, ќе ги има човековите права како основна вредност врз која почиваат заемното почитување на различните нации и држави, и ќе претставува добра основа за одржлив и долгорочен договор за искрено пријателство меѓу два народи и држави. Место тоа добиваме неразумни, нецивилизирани и неевропски барања и уцени, што практично значат крај на постоењето на македонскиот народ и блокада на нашиот пат кон ЕУ.

Имајќи предвид дека Бугарија има 14 пресуди од Судот за човекови права во Стразбур за кршење на основните човекови права на Македонците во Бугарија, се поставува прашањето за фундаментот на функционирањето на Европската Унија во доменот на човековите права на поединецот или групите кои се одделуваат од мнозинството единствено поради нивното декларирање како различни, во контекст на нивната национална или верска припадност.

Република Бугарија ја користи инертноста на Европската комисија која не ги почитува и не ги имплементира законите на Европската Унија, не санкционирајќи ја Бугарија за кршењето на човековите права на Македонците во Бугарија. Република Бугарија го следи примерот на Грција и понижувачкиот Преспански договор како модел за решавање на нејзините национални интереси на сметка на македонските.

Ние, од НовАсном ги почитуваме правдата, владеењето на правото и можноста за самоидентификација, и очекуваме Европската комисија не само да ја советува Македонија како да ги почитува законите и владеењето на правото, туку Европската комисија мора да ги почитува своите, имено, европските закони и владеењето на правото и да имплементира соодветни санкции кон Република Бугарија за кршењето на човековите права на Македонците во Бугарија. Можноста за санкции кон Република Бугарија ѝ е дадена на Европската комисија минатиот декември и ние очекуваме тие да бидат иницирани и имплементирани.
Имајќи ги предвид 14-те пресуди против Република Бугарија, како и инертноста на Европската комисија да ја санкционира Бугарија за кршењето на човековите права на Македонците, НовАсном смета дека е потребно итно раскинување на договорот за добрососедство со Република Бугарија сè додека Република Бугарија не ги имплементира 14-те пресуди на Судот за човекови права од Стразбур.

Почитувањето на основните човекови права на Македонците во Бугарија би претставувало добра основа за нов меѓудржавен и добрососедски договор меѓу Република Македонија и Република Бугарија.

Во меѓувреме, потребна е итна имплементација на структурните реформи во Република Македонија, во судството, јавното обвинителство, јавната администрација, како и во уставниот суд, кои ќе резултираат со градење правно општество каде што секоја индивидуа ќе има еднакви можности за просперитетен живот во здрава животна средина.

1. 1. Го негира нашиот идентитет
      – Со имплементација на член 1 став 3ф, каде што нашата држава се откажува од придавката македонски, како и член 1 став 7 каде што нашата држава се откажува од терминот Македонија, нашиот идентитет е директно загрозен.
   2. Не го реши Македонското прашање на Балканот, туку го продлабочи
      –  Основните човекови права на Македонците во Грција не се решија, на Македонците во Грција им се негира правото на национална самоидентификација, културно и политичко здружување или, пак, какво било формирање заедница базирана на македонскиот јазик, идентитетот и религиозната основа. Грција, во континуитет, нас не нѐ признава како македонски народ, онака како што ние се идентификуваме и поред потпишувањето на Преспанскиот договор.
   3. Ги крши основните човекови права на самоопределување на Македонците и нивната желба да си ја нарекуваат државата Република Македонија
      –  Два референдуми на 8 септември 1991 г. и 30 септември 2018 г. го потврдија нашето суверено право да си ја именуваме државата како сакаме. Правото на самоопределување е цврсто втемелено во ОН, член 1 од Повелбата на ОН.
   4. Процесот на донесувањето на Преспанскиот договор го следеше корупција и недемократска атмосфера која се косеше со изразената референдумска волја на народот на 30 септември, 2018 г.
      –  Референдумската волја на граѓаните е највисоката форма на демократско изразување и претставува примарно мислење над сите останати одлуки во склопот на уставно-парламентарната демократија какава што е македонската.
   5. Се овозможи рамка Грција да ѝ наметнува уцени и закани на РМ на патот кон ЕУ, а без притоа Грција да сноси какви било реперкусии
      –  Во секој момент Грција може да даде вето на Македонија на нејзиниот пат до членство во ЕУ, ако самата Грција има мислење дека делови од Преспанскиот договор не се реализирани од наша страна. Доколку Грција го прекрши Преспанскиот договор и спротивно на него стави вето на Македонија на нејзиниот пат до членство на ЕУ, Македонија нема моќ никако тоа да го спречи. Грција има вето во Советот на министри во ЕУ, притоа ниедна од другите членки на ЕУ нема моќ да ѝ го промени ставот на Грција.
   6. Ѝ даде ветар во грб на Бугарија да ја уценува Македонија
      – На ист начин како и Грција, за да си ги оствари своите национални интереси на сметка на македонските, а без притоа да се признае македонската нација.
   7. Нема економски придобивки со влегувањето во НАТО
      – Во споредба со соседните земји, немаме драстично подобрување во растот на економијата, невработеноста, странските инвестиции.
   8. Ги поткопа, докрајчи, сите македонски национални институции
      – Нашите институции го изгубија предзнакот македонски како резултат на член 1 став 3ф од Преспанскиот договор. Повеќе немаме Македонски институции како Македонска опера и балет, Македонска информативна агенција итн.
   9. Креира еден нов идентитет за државата
      – Низ светот многу медиуми и разни странски влади го користат терминот северномакедонски кога зборуваат за сѐ што е македонско. Нас нѐ нарекуваат Северномакедонци, и веќе немаме македонски претседател, туку северномакедонски, ниту, пак, македонски премиер туку северномакедонски премиер. Придавката произлегува од името, Северна Македонија.

Ние ја поздравуваме и поддржуваме извршната наредба на Претседателот Бајден со датум од 8 јуни 2021 година со која се овозможува стабилност и безбедност во Западниот Балкан преку промоција на владеењето на правото, справувањето со корупција, кршењето на човековите права и поткопувањето на демократските институции. Како и да е, ние сме изненадени и без малку шокирани знаејќи дека истите принципи не беа следени од претходната администрација на САД во 2018 при процесот на донесување во сила на Преспанскиот договор со кои се смени името на Република Македонија. Тој процес ние го оценуваме како очигледно поткопување, деструкција на Македонската држава, кршење на човековите права на македонската нација, имајќи ги предвид деталите од Преспанскиот договор, и тотално игнорирање на демократската волја на македонската нација изразена преку референдумот на 30 септември, 2018 г. За жал, резултатот од референдумот и последователната одлука на Државната изборна комисија беше игнорирана од македонската Влада и од страна на Амбасадата на САД во Скопје.

Во која било западна демократија, на пример, во Обединетото Кралство, кога референдумот за Брегзит се одржа во 2016 г., и беше успешен, Владата на Обединетото Кралство се придржуваше до законот и до демократската волја на народот. Во 2014 година, шкотскиот референдум за независност беше одржан, не беше успешен, Владата на Шкотска ја следеше демократската волја на народот и се држеше до законот.

За жал, поради причините кои се содржани во извршната наредба на Претседателот Бајден, во случајот со македонскиот референдум во 2018 година, законот не беше следен, ниту, пак, беше следена демократската волја на народот.

Ние, во НовАсном, одлучно тврдиме дека наша е одговорноста да го следиме законот, демократската волја на народот изразена на референдумот на 30 септември 2018 година и ќе ги браниме нашите основни човекови права на самоопределување, права кои се втемелени во Повелбата на ОН. Затоа, одлучно и децидно го отфрламе Преспанскиот договор и ќе работиме да го возобновиме името на нашата држава, Република Македонија. Ние нема да отстапиме ниту една педа сѐ додека не ги постигнеме нашите зададени цели, и го повикуваме нашиот македонски народ да ни се приклучи во оваа епска битка да си ја обновиме нашата земја, Република Македонија.